...Буви, бувижон, мени табрикланг, мусобақада ғолиб бўлиб, Осиё чемпионатида иштирок этадиган бўлдим. Бувижон олимпиада мусобақасида қатнашиш йўлланмасини олишим учун дуода бўлинг!

Набирасининг қўнғироқдек овозини эшитган Фотима холанинг кўзлари ёшланди. Айвонда урчуқ йигириб ўтирган онахон дуога қўл очди.

Шўрчи туманидаги “Ибн Сино” маҳалласида яшовчи Муниса Пардаева Низомий номидаги Тошкент давлат педагогика университетининг 2-босқич талабаси. У спортнинг каноэда эшкак эшиш тури билан шуғулланиб, бир нечта мусобақаларда ғолиб бўлган. 2024 йилнинг 19-22-октябрь кунлари спортнинг Пара каноэда эшкак эшиш тури бўйича ўтказилган “Ўзбекистон чемпионати”да иштирок этиб, Осиё ўйинларида қатнашиш йўлланмасини қўлга киритган.

Иккинчи гуруҳ ногирони бўлган Муниса ўз устида ишлашни, доимо ҳаракатда, изланишда бўлишни хуш кўради. У ҳеч қачон изланишдан, меҳнат қилишдан чўчимайди.

-Аниқ мақсад сари интилиб, орзуларимни амалга ошираман, -дейди Муниса Пардаева. - Спортнинг Пара каноэда эшкак эшиш тури бўйича паралимпияда ғолиб бўлишни, дадам фахрланадиган қиз бўлишни орзу қиламан. Бу орзуларимни амалга ошириш учун ҳаракат қиляпман.

Жисмонан имконияти чекланган бўлишига қарамай, ўз вақтида имтиёзлардан самарали фойдаланаётган Муниса Пардаева келгусида инклюзив таълим ривожига ўз ҳиссасини қўшиш ниятида. Инклюзив таълим — бу барча болалар умумий таълим тизимига киритилган ўқув жараёни. Бу ерда “барча болалар”, яъни уларнинг жисмоний, ақлий, интеллектуал, маданий, этник, тил ва бошқа хусусиятларидан қатъи назар, аниқ таъкидлаш муҳимдир. Бу шуни англатадики, болалар ўз яшаш жойларида таълим олиш учун тенг имкониятларга эга.

-Университетда дефектология йўналиши сурдопедагогика тармоғи бўйича таҳсил оляпман, -дейди Муниса Пардаева. - Кар ёки заиф эшитувчи болаларни махсус ўқитиш ва тарбиялаш масалалари бўйича янги замонавий методларни ишлаб чиқиш борасида устозларим билан биргаликда изланяпмиз. Болаларнинг психологик ривожланиш, ўқув фанларини ўқитиш, талаффузни ўргатиш ва “лаб билан ўқиш” меҳнатга ўргатиш, тарбиявий ишлар методикалари орқали кар ва заиф эшитувчи болаларни жамиятдаги ўрнини топишга кўмаклашиш мумкин.

Албатта, яхши ният, эзгу амал ҳар бир инсонни улуғлайди. Меҳнати орқали жамиятда ўз ўрнини топишга ундайди.  

Нигина Шоева

Журналист.